Yoga er fyri øll og snýr seg um at sameina, styrkja og skapa javnvág í kroppi, andadrátti, sinni og sál.

Tað, sum hevur stórstan týdning í tilveruni, er tað, sum hendir uttanfyri yogamottuna. 

Yogamottan er eitt “pit stop” í gerandidegnum, ein stutt vitjan, har tú heilsar uppá, leggur merki til og stillar ljóðførið. 

Yoga er at meta sum ein møguleiki at uppliva, sansa og merkja lívið, sum vit liva, sum ein partur av eini størri heild.

At geva gætur er eitt lyklaorð, og kropsligu rørslurnar fara fram við róligari ferð eftir tínu egnu náttúrligu rútmu í andadráttinum. Tað snýr seg um at vera tilstaðar her og nú, at finna sína egnu rútmu og miðja ímóti at liva í gerandislívinum í síni egnu rútmu.

“Yoga is a state in which you are present – really present – in every moment, in every action.” T.K.V. Desikacar

Reglulig útinnan av yoga gevur sum heild størri tilvitan, orku og vælveru í gerandisdegnum m.a. við at betra um útreinsan, styrki, miðsavnan og jarðfestið bæði kropsliga og sálarliga. Kropsburður og tilvitan betrast sum heild, og harvið kunnu overving, strongd, slit og skaði í gerandislívinum fyribyrgjast.

Kapping er ikki í yoga. Tað eru eingin krøv um avrik, og kropsligu rørslurnar verða tillagaðar tí einstaka. Tað, sum krevst, er ynski og viljin til at arbeiða við sær sjálvum og sínum kroppi.

Eg leggi dent á tað blíðu tilgongdin, har tú vendir uppmerksemið inneftir og rútman í andadrátti, kroppi og sinni miðsavnast og stillast ígjøgnum blíðar andadráttsvenjingar, kropsligar rørslur og djúpa hvíld. Harafturat verða tær kropsligu rørslurnar tillagaðar til tann einstaka – eitt nú við hjálpiamboðum m.a. yogapøllum, yogakubbum, teppum, belti og eygnapútu.

Tað finnast nógv sløg av yoga.

Mín undirvísing er ein blanding av Restorative Yoga, Hatha Yoga og Shakti Yoga, og kann í stuttum nevnast Restorativ Hatha Flow.

Shakti Yoga er tann kvinnuliga tilgongd til yoga bæði kropsliga og sálarliga.

Lyklaorðini í Shakti yoga eru m.a. styrkin í tí bleyta, móðirliga, flótandi, viðurkennandi, ósjónliga, intuitiva, kreativa, cykliska, umfevnandi og nærleikin og kærleikin til tað, sum er.

Í undirvísingini innganga:

Andadráttstilvitan og andadráttsrørslur, sum sameina kroppin og sinnið, økja um renslið í kroppinum og styrkja nervalagið og minka um spenningar og strongd.

Kropsligar rørslur og støður, sum økja um renslið í kroppinum, minka um spenningar og styrkja vøddar og andadrátt.

Djúpa hvíldin, sum er so sera uppafturbyggjandi bæði kropsliga og sálarlig og styrkir nervalagið og minkar um spenningar og strongd.